ཚ་བའི་ནད་གསོ་བའི་སྐོར།
ཡོང་ཁུངས། ཟིན་ཏིག | ཀློག་གྲངས།
ཚ་བ་ཐོག་མར་ཕོག་སྐབས་ལུས་གྲང་ཤུམ་བྱེད། མེ་ཉི་ལ་དད། རྐང་ལག་བརྐྱང་བསྐུམ་ད་། རྨི་ལམ་ཟ་ཟི་མང་། མགོ་དང་རུས་ཚིགས་ཉྭ་གཞི་ལ་གཟེར་བྲེང་བྲེང་འཁྱུག རྩ་སྟོང་ལ་རྒྱུག ལྕེ་སྐྱ་བོར་རླུང་འབྲུམ་དམར་ཚེམ་བ་ནི་མ་སྨིན་པའི་ཚ་བ་ཡིན་པས། དེ་ལ་བསིལ་སྨན་གཏར་བཤལ་སོགས་ཀྱིས་ཚ་བ་བྱར་གྲོ་ཞིང་། དྲོད་བཅོས་བྱས་ན་ཚ་བའི་གྲོགས་སུ་འགྲོ་བས་སྤང་། ནོར་བུ་བདུན་ཐང་ངམ་མ་ནུ་བཞི་ཐང་ལན་ཁ་ཤས་བཏང་། སྨིན་དཀའ་ན་བསིལ་བཅུད་བཅོ་ལྔ། སྨན་སྤྲིན་བྲལ་ཟླ་ཟེར་ཡང་བཏང་བས་སྨིན་པའི་རྟགས་གྲང་ཤུམ་ཆད། ལྕེ་འབྲུམ་ཡལ། གཟེར་བབས་པའི་གནས་གཅིག་ཏུ་འདུས། རྩ་འཁྲང་་འཕར་མྱུར། ཆུ་མདོག་དམར་སེར་དྲི་མ་དུགས། རླངས་པ་ཆེ་ཞིང་ཡུན་རིང་། ལྦུ་བ་ཕྲ་ཞིང་སང་ན། ཆུ་གར་ཉམས་ཡོད་ཅིང་ཀུ་ཡར་ཐུག ལུས་ལ་རྡུལ་འབྱུང་བ་སོགས་བྱུང་ན། གཙོ་བརྒྱད། བེ་དོ་བཅུ་གསུམ། སྟོད་ལུགས་དང་ཟུར་ལུགས་སྤང་རྩི། གི་ཝཾ་དགུ་པ། མན་རྒྱུད་ཙནྡན་སྦྱོར་བའི་རིགས། ཐང་ཆེན་བརྒྱད་པ་སོགས་བཏང་། སྤང་རྩིའི་རིགས་འདི་དར་མ་ཁྲག་ཤེད་ཅན་མ་གཏོགས་རྒས་པ་དང་རླུང་ཅན་ལ་ཅུང་མི་ལེགས། ཁྱད་པར་རྟ་ཟི་རིལ་བུ་ཚད་ལྡན་ནོར་བུ་བདུན་ཐང་གིས་འཕུལ་ཟབ། འདིའི་སྦྱོར་ཚད་ངར་ཕུག་ཨེམ་མཆིའི་་ལན་ལྟར་དགོས། རྩ་བདུན་བརྒྱད་ཙམ་དྲག་ཏུ་འཕར་ནས་སྡོད། ཆུ་མདོག་ལྗང་ངམ་ནག་ཞད་བྱུང་ན་གཉན་དང་བསྡོངས་རྟགས་ཡིན་པས་གཙོ་ཁྱུང་ཁོ་ན་ཟབ། དེ་རྣམས་ཀྱིས་མ་ཐུབ་ན། སྲོ་མ་རྟ་རིའི་བཤལ་སྨན་གྱི་རིལ་བུ་དང་པོ་བདུན། བར་དུ་བཞི། ཐ་མ་གསུམ་རེ་བཏང་བས་ཉི་ཤར་དུས་ཐེབས། བཅད་རན་ནས་ཆུ་གྲོགས། དེ་རྗེས་ཤ་གསར་བཙབས་པའི་ཁུ་བ་ཕྲན་བུ་བླུད། ཚད་རྟགས་སླར་འཕར་ན་སྔོན་གྱི་ཚ་སྨན་རྣམས་བཏང་། དེ་རྣམས་ཀྱིས་གཟེར་ཁ་ཆག རྩ་ཅུང་དལ་བའམ་རྒྱུག་ཀྱང་མནན་ན་སྟོང་། ཆུ་དྭངས་པའམ་དམར་ཡང་ཀུ་ཡ་སྲབ་ཅིང་སླ་ལ་ལྦུ་བ་ཆེ། དྲི་དང་བྲོ་བ་མེད། ལྕེ་དམར་སྐམ་རྩུབ། སྐྲ་རྩ་སེང་། ཁྱད་པར་རླུང་གསང་ཚིགས་པ་དང་པོ་མནན་མི་བཟོད་པ་བྱུང་ན་རི་ཐང་མཚམས་སུ་སླེབས་པ་ཡིན་པས་བཅོས་ཕྱི་ན་སྟོང་སོགས་ཀྱིས་ལ་འདའ་བ་སྲིད་པས། ཕོ་ལོང་སོགས་སྣོད་ཚད་ལ་མན་ངག་བསིལ་སྦྱོར། ཅུ་གང་བདེ་བྱེད། གློ་སྙིང་སོགས་དོན་ཚད་ལ་ཨ་གར་བཅོ་ལྔ་དང་། སོ་ལྔ་གཉན་སྨན་ཅན་ཐུན་ཆུང་རེ་སད་མདའ་བཏང་བས་ཕྱིར་ནངས་ལྕེ་རློན་ཞིང་། ཁམས་དྭངས་ཞད་ལས་ཐུ་སྐྱེན་ཚེ་དེ་རྣམས་ཐུན་ཅུང་ཆེ་བ་དང་། ཚད་སྨན་ལྟག་སྤྲོད་ཞག་གཉིས་ཙམ་བཏང་། དེ་ནས་བ་འོ་ཕུལ་གང་དང་ཆུ་ཕུལ་གང་མཉམ་དུ་བསྐོལ་བ་བཏང་བས་སྔ་མ་ལས་ཚད་རྟགས་བྲི་ན། ནོར་གྱི་སྲེ་ལོང་གསར་པ་ལྤགས་གས་ཕུད། ཐལ་ཚན་དུ་ཧྲོག་ཙམ་བྱས་པ་ཆུ་ནང་དུ་ལྷོག་ཙམ་བསྐོལ་ཁུ་ཞག་བཅད་ནས་དགོང་མོར་སུན་ཙམ་བཏང་བས་བདེ་ཉམས་ཡོད་ན། སྲེ་ལོང་བཅག་ནས་དུམ་བུ་གཉིས་སུ་བྱས་པའི་དུམ་བུ་རེ་རེའི་ཁུ་བ་ཞག་བཅད་ཉིན་གཉིས་སུ་བཏང་། དེས་ཇེ་བདེ་ཇེ་དྭངས་སོང་ན་ཤ་གསར་མཐེ་བོང་དྲག་ཙམ་བཙོས་ནས་བཏང་བ་སོགས་ཟས་ཆ་ཡིས་གློད། སྨན་ནངས་མོ་སྤྲིན་བྲལ་ཟླ་ཟེར། གཙོ་བརྒྱད་གཡུ་རལ། གི་ཝཾ་དགུ་པ། ཉིན་གུང་གཙོ་བརྒྱད་དམ་སྤྲིན་ཟླ། ནུབ་མོ་ཨ་གར་བཅོ་ལྔ། སོ་ལྔ། བསིལ་བཅུད་བདེ་བྱེད་ཆུང་ངུ་སོགས་བསྟེན།
