0971-8201019
མ་ཤོག > སྨན་བཅོས། > དུག་ནད་ཀྱི་སྐོར། >

 

 

གསོ་རིག་ཟིན་ཏིག་ལས་དུག་ནད་གསོ་པའི་སྐོར།

ཡོང་ཁུངས།   གསོ་རིག་ཟིན་ཏིག   |   ཀློག་གྲངས།    

       སྦྱར་དུག་ལ། ཕྱི་ནང་གསང་རྟགས་རྒྱས་པར་མན་རྒྱུད་ལས་གསུངས་པ་ལྟར་ཤེས་དགོས་པ་ལས་ཕྱོགས་རེས་མི་རྟོགས་ཀྱང་། མདོར་སྡུས་ཕྱི་རྟགས་ནང་སྔ་ནམ་ལངས་གཏམ་མ་ལབས་བ་ཟས་མ་ཟོས་སྐབས་མཆིལ་མ་མ་དཀྲོག་པར་རང་ལུགས་དེ་རྒྱ་ཙང་ཕོར་གང་དུ་བླུགས་པས་ཁར་ལྡིང་ན་མིན་ལ་གཏིང་དུ་སོང་ན་ཡིན། ཡང་དཀར་གོང་མེས་བསྲེགས་པའི་སྟེང་མཆིལ་མ་བླུགས་ལ་གྲང་ནས་བཅག་པས་ནས་གང་ཙམ་ནག་པོར་སོང་ན་ཡིན། ནད་རྟགས་རྩ་རྒྱུད་འགྱུར་ལྡོག་མང་ལ་གདོན་རྩ་དང་། ཆུ་མདོག་མ་ངེས་པ་སྣ་ཚོགས་འགྱུར། ཟངས་ལ་བྱུགས་ན་ནག་པོར་འགྲོ། ནད་སྣ་མང་ཞིང་འགྱུར་ལྡོག་ཆུང་། ཟས་ཟོས་ཀྱང་ལུས་སྟོབས་འཆོར། ཕོ་མཆིན་མི་བདེ། ཆམས་རིམས་མང་དུ་ཕོག སྙིང་མི་དགའ། དོན་མེད་པར་ན་ཞིང་དོན་མེད་དུ་དྭངས་པ་རྣམས་དུག་རྟགས་ཡིན། གསང་རྟགས་རེ་རལ་བའི་འོ་མར་བཏབ་པ་བཏང་བས་སྐྱུགས་པ་དང་། སྡུད་སྨན་བཏང་བས་འདུས་རྟགས་བྱུང་ན་ངེས་པ་ཡིན། དེ་ལ་ཐོག་མར་སྡུད་སྨན་ཐང་ཆེན་ཉེར་ལྔ། བྱང་ལུགས་སྔོ་ཐང་བཅུ་གསུམ་རིགས་གཉིས། བསེ་རུ་བཞི་ཐང་རྣམས་བཏང་། འདུས་རྟགས་ལུས་ལྕི་ཞིང་སྒྱིད་པ་བསྐྱུར་ཡི་ག་འགག ཁ་ལྕེ་སྐམ། ཕོ་བར་ཚ་རུབ་བྱེད། དེ་ལྟར་མ་བྱུང་བར་སྡུད་སྨན་ནན་བསྐྱེད་ཅིང་སྐབས་སུ་མཐིལ་བཞི་བཀུ་མཉེ་དང་། ཕོ་བར་རུས་དུགས། རྒྱུ་ཞབས་ལ་བྱེ་མའི་དྲོད་དུགས་བྱ།
        ཁ་ཟས་མ་འཕྲོད་པ་དང་མ་གོམས་པ་དང་དུས་མིན་ཟོས་པ་སོགས་མེ་དྲོད་ཀྱིས་འཇུ་བར་མ་ནུས་པར་ངས་གས་འདྲེས་ཏེ་རྩ་མིག་ཏུ་བྱེར་བས་གྱུར་དུག་ཏུ་སོང་། ནད་རྟགས་རླུང་མཁྲིས་སོགས་སྡོང་ཟླ་ལྟར་སྟོན། ཕོ་བ་རྩིབས་ལོག་གཟེར། སྒྲེག་ཅིང་སྦོ་ལ་ཟས་འཇུ་དཀའ། རྩ་ཕྲ་ལ་གཏིང་ན་གྲིམས། ཆུ་མདོག་དམར་པོའམ་སྨུག་ལ་ཀུ་ཡ་དུམ་བུར་ཆད། དེ་ལའང་སྦྱར་དུག་ལྟར་སྡུད་གསོད་བཤལ་གསུམ། ཚབས་ཆེ་ན་མང་སྦྱོར་བཏང་། ཡང་ན་ཐོག་མར་ཕྱི་རྒྱུད་ཀྱི་སེ་འབྲུ་བཞི་བའམ་ད་ལིས་བཞི་བ་བཏང་། དེ་ནས་ཐོ་རངས་སྤོས་དཀར་ཕག་ཁྲག་སྟར་བུ་སྦྱར་བ་དང་། སྲོད་ལ་འོ་མའི་ནང་ལན་ཚྭ་བཏབ་པ་ལྟག་སྤྲོད་དུ་བཏང་། འདུས་རྟགས་ཁོང་པ་སྙོམ། ལུས་ལྕི་ཞིང་མཆིལ་སྣབས་མང་། ཁ་ཟས་མི་ལེན་པའི་སྐབས། མན་རྒྱུད་གི་ཝང་བཅོ་ལྔ་དང་། བོང་དཀར་བཅུ་གཅིག་ལྟག་སྤྲོད་ཀྱིས་བཏང་ལ་གང་ཉེའི་གནས་ནས་སྐྱུག་བཤལ་གྱིས་སྦྱོང་བའམ། འདུས་རྟགས་བྱུང་འཕྲལ་སྦྱོང་བསད་གཅིག་དྲིལ་བྱས་ཀྱང་ཆོག དུག་ནད་སྤྱི་ལ་དཔའ་བོ་ཉེར་ལྔ། སུ་མི་བཅུ་གསུམ། ཟུར་མཁར་བའི་སེང་གེ་གསུམ་འགྲོལ་ཉུངས་མའི་ཁུ་བས་ཕུལ་བ་དང་། གླང་ཐབས་དང་བསྡོངས་པ་དང་། མ་ཞུ་དུག་ཐབས་བྱུང་བ་རྟགས་གོང་དུ་སོ་སོའི་སྐབས་སུ་བཤད་པ་ལྟར་བཅོས། ཁྱད་པར་མ་ཞུ་དུག་ཐབས་ལ་ཟུར་ལུགས་སྐྱ་ཁྲ་སུམ་འགྲོལ་ལམ། མ་ཞུ་བའི་དུག་བྱུང་འཕྲལ་ཐབ་ཀའི་ནང་ས་ཚིག་དམར་པོ་ཕྱེ་མ་བྱས་པ་ཆུ་བསྐོལ་ཚན་མོར་སྦྱངས་པ་ཕོར་བ་དོ་གསུམ་འཐུངས་པས་སྐྱུགས་འོང་ཞིང་། དེ་རྗེས་སྨན་བཏང་དགོས་མིན་ནད་ལ་དཔྱད་པས་ཀྱང་ཆོག ཡང་རི་ཀླུང་གི་དྲེས་མའི་རིགས་མང་པོ་ཁཎྜ་རིལ་བུ་ལུག་རིལ་ཙམ་བྱས་པ་ཆུ་བསྐོལ་གྱིས་ཕུལ་བས་ཉིན་རེའི་དུག་ཐབས་དང་མཆིན་པའི་དུག་ཚད་ལ་ཤིན་ཏུ་ཟབ།།
གཙོ་ངོས།

རྒྱ་ཡིག་པར་ངོས།

ཁ་པར་པར་ངོས།

དབུ་རྩེར་ཐོན་པ།