རིན་པོ་ཆེའི་སྨན་སྡེ་ལས་རིན་ཆེན་དངུལ་ཆུའི་སྐོར།
ཡོང་ཁུངས། <<ཤེལ་གོང་ཤེལ་ཕྲེང་>> | ཀློག་གྲངས།
དངུལ་ཆུས་བཅུད་ལེན་ནད་གདོན་ཀུན་འཇོམས་མཆོག། ཅེས་པའི་མིང་ལ། སཱུ་ར། བདུད་རྩི་འམ་དངུལ་ཆུ། སཱ་ད་ར། རྒྱུག་བྱེད། ཙ་པ་ལ། འདེད་བྱེད། སཱ་ར་ཏོ་ར་མ། ཁུ་བའི་དབང་པོ། ཧ་ར་མཱིཛྫ། འཕྲོག་བྱེད་ས་བོན། མཧཱ་དྷཱ་ཏུ། ཁམས་ཆེན་པོ། ཤུདྡྷ་དྷཱ་ཏུ། དག་པའི་ཁམས། སཱུ་ཏ་ཀཾ མཚལ་སྐྱེས། ཧིངྒུ་ལཾ། དམར་པོར་སྐྱེས། རཀྟྲི། དམར་པོ། པ་ར་ད། མཆོག་སྦྱིན། ཧཾ་ས་པཱ་དཾ། ངང་བའི་རྐང་པ། ར་ས་ཡ་ན། བཅུད་ཀྱིས་ལེན་པ། པ་ར་ཏ། མཆོག་ལྡན། ར་ས་པ་ར། རོ་མཆོག་ཅེས་དང་། གབ་ཏུ། འབིགས་བྱེད་རྒྱལ་པོ། མཚལ་ཆུ། མཚལ་གྱི་བུ། ཟླ་བའི་གཟུགས་ཅན། ཟླ་བ། ཟླ་བསིལ། བདུད་རྩི་བཅུད་རྒྱལ། ཀུནྡའི་རང་བཞིན། དབང་ཕྱུག་ཐིག་ལེ། ས་བདག་བཅུད་འདུས། རབ་ཏུ་གཡོ་བ། ཆུ་སྨན་རལ་གྲི་རེག་གཅོད་བདུད་རྩི་དར་ཡ་ཀན། ཐིག་ལེ་དར་ཡ་ཀན། བདུད་རྩི་ཟླ་བའི་ཟིལ་བ། སྨན་གྱི་གཙོ་བོ་སྤྱི་ས། ཟུག་རྔུ་ཞི་བྱེད། ཆུའི་སྨན་པ་དཀར་པོ། བསིལ་བྱེད་གངས་ཀྱི་ཁྱུང་རྒོད། བསིལ་ཆེན་གངས་ཀྱི་ཆུ་རྒྱུན། གནམ་གྱི་བྱ་ཁྱུང་དཀར་པོ། ལྕགས་ཀྱི་དུར་ཕག་སྔོན་པོ། བདུད་རྩི་གངས་ཀྱི་སེང་གེ བདུད་རྩི་ཆུ་རྒྱུན། གནམ་ལྕགས་རྡོ་རྗེའི་ཁྲབ་རིང་། དུག་རལ་འབར་བ་རྩེ་དགུ རྫས་ཀྱི་རྡོ་རྗེ་ཕ་ལམ། དེ་དག་མིང་གི་མངོན་བརྗོད་ཡིན་ལ། སྐབས་འགར། ད་ཆུ་ཟེར་བ་ཡོད་པས་མཚལ་ད་ཆུ་དང་མ་ནོར་སྐབས་ཕྱེད་གཅེས་སོ།། འདིའི་ལོ་རྒྱུས་སྔོན་རབས་མང་ཡང་བཤད་ཁུངས་ཡང་འདྲ་མིན་མང་ཕྱིར་བཞག དོན་ལ་ལྷ་དབང་ཕྱུག་ཆེན་པོའི་ཐིག་ལེ་ཡིན་པར་བཤད། བྱུང་ཁུངས་རང་བྱུང་ཞིག བྲག་དབང་ཕྱུག་གི་ལིངྒ་འདྲ་བར་ཡོད་པ་བུད་མེད་ཀྱིས་ལེན་པ་ཆགས་རྐྱེན་གྱིས་འབབ་ཚུལ་སོགས་གཏམ་ཁུངས་འདུག་ཀྱང་བརྟག་བྱར་མཆིས། ལག་ལེན་དངོས་ལ། རྒྱ་བོད་ཀྱི་མཚལ་རིགས་གང་རུང་དང་། རྡོ་དངུལ་རྡོ་འདྲ་ལ་བསྲེགས་སྲེག་དུད་པར་ཡལ་བ་ཞིག་དང་། རྡོ་ཕ་བོང་ལོང་བུ་དང་། མིའི་རྔུལ་དྲེག་ཅན་གྱི་གོས་དང་། རོ་གོས་ཆར་ཟག་སོང་བ་དང་། མཚེར་ཤུལ་གྱི་རེ་བ་ཆར་ཟག་སོང་བ་དང་། སྔོ་སྣེའུ་དང་། བྱ་ཕུག་རོན་དང་། འབུ་སྡིག་པ་ནག་པོ་སྟེ། རྫས་སྣ་དགུ་པོ་འདི་གང་རིགས་ལས་འབྱུང་བས་དེའི་ལག་ལེན་ཁོ་བོས་ལོགས་སུ་བྱས་ཡོད་ལ། དེ་དག་ཀྱང་དོན་བསྡུ་ན། རྡོ་ལས་བྱུང་བ་དང་། སྲོག་ཆགས་ལས་དང་། སྔོ་ལས་བྱུང་བ་གསུམ་དུ་འདུས། གང་ཡང་དཀར་ཞིང་གཡོ་བ་ནི་རྒོད། སྔོ་ཞིང་དལ་བ་གཡུང་། རྒོད་གཡུང་གང་ལ་ཡང་། ལྕི་བའི་དུག་དང་། འབིགས་པའི་དུག རྩིའི་དུག་དང་གསུམ་ཡོད་པས། དེ་གསུམ་བསད་ཐབས། བཀྲུ་བཙོ་སྦྱང་གསུམ་གྱི་ཆོ་གས་ལག་ལེན་རྒྱས་པ་གྲུབ་པའི་བསྟན་བཙོས་ཀྱི་དགོངས་པ་དང་། བསྡུས་པ་འདུལ་ཐབས་མི་འདྲ་བ་གྲུབ་པའི་སློབ་དཔོན་མང་པོའི་ཕྱག་ལེན་ཐ་དད་པ་རྣམ་གྲངས་བཅོ་ལྔ་ཙམ་ཡོད་པ་ཁོ་བོས་གཅེས་བསྡུས་སུ་གསལ། རྫས་སྦྱོར་འགའ་ཞིག་གི་སྐབས་དགོས་ཆེད་མ་གཏོགས་ནམ་ཡང་དུག་མ་བསད་པ་སྨན་དུ་གཏོང་བའི་ཐབས་མེད་པ་གནད་ཀྱི་དམ་པའོ།།
